நாமக்கல் மாவட்டம் பரமத்திவேலூர் அருகே பாண்டமங்கலம் பகுதியில் வீட்டில் வைத்திருந்ததாக கூறப்படும் நாட்டு வெடி வெடித்ததில் 3 பேர் உயிரிழந்ததாக தகவல் வெளியாகியுள்ளது.
பாண்டமங்கலம் மைனர் வீரப்பம்பாளையம் பகுதியில் குடியிருப்புகள் நிறைந்த இடத்தில் இந்த வெடி விபத்து நிகழ்ந்ததாக கூறப்படுகிறது. வெடி வெடித்ததில் வீடு இடிந்து சேதமடைந்த நிலையில், இடிபாடுகளுக்குள் மேலும் சிலர் சிக்கியிருக்கலாம் என அஞ்சப்படுகிறது.
இந்த சம்பவத்தில் சந்தியா என்ற பெண் உட்பட 3 பேர் உயிரிழந்ததாக முதற்கட்ட தகவல்கள் தெரிவிக்கின்றன. அருகில் உள்ள வீடுகளில் இருந்த பொதுமக்கள் வெடி சத்தத்தால் அதிர்ச்சியடைந்தனர்.
தகவலறிந்து வேலாயுதம்பாளையம் மற்றும் நாமக்கல் தீயணைப்புத் துறையினர் சம்பவ இடத்துக்கு விரைந்து சென்று இடிபாடுகளை அகற்றி மீட்புப் பணியில் ஈடுபட்டு வருகின்றனர்.
மேலும், பரமத்திவேலூர் போலீசார் சம்பவ இடத்தில் விசாரணை மேற்கொண்டு வருகின்றனர். உயிரிழந்தவர்கள் குறித்த முழுமையான விவரங்கள் மற்றும் வெடி விபத்துக்கான காரணம் குறித்து விசாரணைக்குப் பிறகே முழுமையான தகவல்கள் தெரியவரும்.